પોલિસ બનેલો માણસ

કંઈક ખાખી પડ્યું છે એના વેશમાં,

કંઈક ખાખી પડ્યું છે એના વેશમાં.

ખાલીખમ ખિસ્સાનો મોજીલો જીવ

આમ અમથો ફરે નહી આવા વેશમાં ... કંઈક...

અક્કેકી વસ્તુનાં મૂલ એ ચૂકવતો'તો

ગઈ કાલે દીઠો'તો  મેં;

બધ્ધીયે રેંકડીથી  અક્કેકી તફડાવે

આજે નફ્ફટ થઈને એ.

છાતી સંતાડતી એકેય બાઈ એને

કહેતી નથી કે તું લઈશ મા..... કંઈક...

ગમતીલું બોલતો'તો, સહુને એ ગમતો 'તો ,

માણસ જેવો એ હતો માણસ;

આજે એ ઘૂરકે છે, ગાળો યે બોલે છે,

જાણે ગંદુ કંઈ પી ગયેલો માણસ.

મોટેરાં ઘરડેરાં , બાઈયું ય સાંભળી લે

કોઈ યે ના વારે , કંઈ કૈશ મા.... કંઈક...